Настани

Бројна публика на промоцијата на култниот роман „Јелгава ’94“ од Јанис Јоневс

„Јелгава ’94“ од Јанис Јоневс е култен роман за историјата на летонскиот метал од средината на 90-тите години.

За овој роман, македонскиот писател Бранко Прља вели: „Но, ова не е само книга за металци или за тие кои се заинтересирани за историјата на музиката туку и за секој што се интересира за една автентична, едноставна, непретенциозна и духовита приказна сместена во една постсоцијалистичка земја. За нејзината универзална вредност зборува и тоа дека по објавувањето книгата станала национален бестселер, ги добила наградите за дебитант на годината во Летонија и Европската награда за литература за 2014 година. Јанис Јоневс е вистински раскажувач! Дијалозите се мајсторски изведени, лесни и интересни и без сомнение ќе ве вовлечат во светот на авторот.“ Преводот на романот од англиски на македонски јазик е на Владимир Јанковски.

Текстот е многу слоевит со референции на историјата и културата на Летонија и на градот Јелгава, град што бил најпогоден за време на Втората светска војна во Летонија. Се работи за приказна за една младост, бурна и бунтовна, за растењето во сивите ’комунистички’ згради во времето веднаш по распадот на Советскиот Сојуз, за еден млад човек кој стои сам (со своите верни другари) против семејството, општеството и светот, со показалецот и малиот прст исправени високо нагоре за да не стане како „возрасните“, конформист, обичен, здодевен…“

Објавувањето и промоцијата на книгата „Јелгава ’94“ е поддржано од програмата Креативна Европа на Европската Унија.

„Јелгава ’94“ од Јанис Јоневс е дел од двогодишниот проект на издавачката куќа „Готен“ насловен „Балтикот вирално преку литературата на Балканот“, проект кој опфаќа превод на 10 книги од еден од најмалку претставените региони од Европската Унија во Република Македонија. Станува збор за одлична книга од автор кој е еден од најинтересните книжевни гласови на летонската книжевност од поновата генерација.

Автор на фотофрафии Соња Ставрова



Остави Коментар