Настани

Рику Корхонен го претстави својот „Медицински роман“ пред македонската публика

„Медицински роман“ е прекрасен роман за љубовта, смртта и политиката. Ја раскажува приказната за четири преплетени животни судбини… Крајот на летото во 2003 година е жешко и интензивно на многу начини. Во Ирак, западните сили ветуваат дека во земјата ќе ги донесат демократијата и капитализмот. Далеку од овие битки, во еден приморски град во северна Европа, младиот Никлас многу време поминува во пиење и во грижа за својата девојка Ина, чиј татко умира од рак. Една ноќ Никлас доживува визија што го променува. Верува дека нашол лек за причините за грижите на својата девојка.

Во овој прекрасно напишан роман, Корхонен создава знаменита приказна за преплетените судбини, возбудлива анализа на медиумската војна и духовита имитација на љубовен роман.

За „Медицински роман“ во 2010 година Корхонен ја добива Наградата на Европската Унија за литература.

Рику Корхонен (1972) дебитираше на литературната сцена во 2003 година и брзо стана еден од главните современи фински писатели. Пред целосно да се посвети на литературата, работи како наставник во средно училиште и како предавач по креативно пишување на Универзитетот во Турку.

Извадок од „Медицински роман“, автор Рику Корхонен, превод од бугарски јазик: Борче Георгиев.

„Стоев пред оградата и зјапав во белите букви пред мене. Размислував за Ина и за нејзиниот напад при дишењето и за белите дамки по нејзиното тело и за нејзините гаќички. Размислував за тоа колку добро се сеќавам на обликот на нејзините гради, потоа за нејзините испразнети бели дробови и неможноста да земе воздух, за тоа колку одеднаш се претвори во туѓинец кога не можеше да диши и како нејзиното лице доби различен поглед од тагата што ја чувствуваше и како наеднаш во мене напукна нешто, а јас почувствував дека потонува нешто во мене. Како веќе ништо не може да се направи, во моментот кога почна да се грчи нејзиното лице, нешто во неа се обидуваше да се ослободи, да вреска и да се разголува, нешто што нејзиното лице го скриваше претходно.

Такво нешто никогаш порано немав почувствувано. Такво нешто никогаш порано немав видено. Кога помина сето тоа, ги почувствував нејзините прсти во мојата коса, го почувствував нејзиното мокро лице, го допрев лицето до нејзиното, а потоа ја слушнав како махинално ми повторува: „Еби ме. Еби ме како што треба“. Ама, јас сакав само долго и нежно да ја прегрнувам, да ја допирам, да ја ослободам од целата загриженост што ја чувствуваше и да ја бакнувам, да ѝ ја галам косата, бидејќи почувствував како Ина да ја имаше допрено смртта и сакав да ја прашам: „Можеш ли да почувствуваш љубов од човек сличен на себеси?“

Објавувањето на романот „Медицински роман“ се реализира во рамки на проектот „Балтикот вирално преку литературата на Балканот“, кој опфаќа превод на 10 книги од книжевности што припаѓаат на балтичкиот регион.

Објавувањето на книгата е поддржано од програмата Креативна Европа на Европската Унија.

 



Остави Коментар